Дар доираи нақшаи чорабиниҳои Раёсати кор бо ҷавонон ва варзиши вилояти Суғд, бахши кор бо ҷавонон ва варзиши ноҳияи Бобоҷон Ғафуров дар ҳамкорӣ бо Қувваҳои ҳарбӣ-ҳавоӣ ва мудофиаи зиддиҳавоии Қувваҳои Мусаллаҳи Ҷумҳурии Тоҷикистон ҳамоиши оммавӣ доир гардид. Чорабинии мазкур бахшида ба Рӯзи Ваҳдати миллӣ таҳти унвони «Мо, сарбозону афсарон – посдорони сулҳу ваҳдат» дар қисми ҳарбии 08941-и Вазорати мудофиаи Ҷумҳурии Тоҷикистон баргузор шуда, дар он муовини фармондеҳи Қувваҳои ҳарбӣ-ҳавоӣ ва мудофиаи зиддиҳавоӣ полковник Абдурашид Ҳотамиён, собиқадори Вазорати мудофиа генерал-майори мустаъфӣ Назарзода Назар Бадал, намояндагони Раёсати кор бо ҷавонон ва варзиши вилояти Суғд Аҳлидин Мелиҷонов ва Сардор Абдуллоев, мудири бахши кор бо ҷавонон ва варзиши ноҳияи Бобоҷон Ғафуров Баҳодурзода Баҳридин, омӯзгорони Донишгоҳи давлатии Хуҷанд ба номи академик Бобоҷон Ғафуров Махсудхӯҷа Нӯмонов ва Ёдгор Раҳматов, инчунин командири қисми ҳарбии 08941 подполковник Рустам Умарзода иштирок ва суханронӣ намуданд.

Зимни суханронӣ масъулин ва меҳмонони ҳамоиш оид ба аҳамияти таърихии Ваҳдати миллӣ, нақши калидии он дар таҳкими сулҳу суботи саросарӣ ва ҳифзи дастовардҳои Истиқлолияти давлатӣ, баланд бардоштани ҳисси ватандӯстиву худшиносии миллӣ миёни ҷавонон ва хизматчиёни ҳарбӣ таваҷҷуҳи хос зоҳир намуданд.

Гуфта шуд, ки ҳифзи сулҳ, субот ва ваҳдати миллӣ вазифаи муқаддаси ҳар як шаҳрванди Тоҷикистон, бахусус ҳимоятгарони Ватан ба шумор меравад. Ҷорабинӣ дар руҳияи ватандӯстӣ ва ифтихор аз соҳибдавлатӣ анҷом ёфт.

Дар доираи нақшаи баргузории хонишҳои сиёсӣ оид ба тақвияти фаъолияти Иттифоқи ҷавонони Тоҷикистон дар корхонаҳо, ташкилоту муассисаҳои ноҳиявӣ, таҳти унвони “Ҷавонон ва ҳифзи дастовардҳои Истиқлолияти давлатӣ” хониши сиёсӣ бо кормандону мутахассисони ҷавони филиали ҶСК “Бонки Эсхата” доир гардид. Дар ҷараёни хониши сиёсӣ масъулин дар суханронҳо таъкид доштанд, ки дар тӯли 35 соли Истиқлолият Тоҷикистони азиз роҳи пурифтихори рушду созандагиро тай намуда, ба дастовардҳои назарраси таърихӣ ноил гардидааст. Зикр шуд, ки бунёди роҳҳову пулҳо, муассисаҳои муассири таълимӣ ва тандурустӣ, рушди босуръати иқтисодиёт, таҳкими сулҳу субот ва болоравии сатҳи зиндагии мардум маҳз аз самараҳои шаҳдбори даврони соҳибистиқлолии кишвар мебошанд. – Ҳифз ва таҳкими дастовардҳои истиқлолият вазифаи муқаддаси ҳар як шаҳрванди кишвар аст. Хусусан ҷавонон ва мутахассисони соҳаҳои гуногун бо фаъолияти софдилона ва масъулиятшиносии худ метавонанд дар ободии Ватан саҳми арзанда гузоранд, – изҳор доштанд, маърӯзачиён.

Дар хотима изҳори умедворӣ карда шуд, ки таҷлили 35-солагии Истиқлолияти давлатӣ барои ҳар як сокини ноҳия, бавижа ҷавонон, илҳомбахши корҳои созанда, ваҳдату ҳамдигарфаҳмӣ ва дастовардҳои нави меҳнатӣ мегардад.

Дар асоси Нақшаи чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон, дар доираи амалисозии бандҳои муҳими «Стратегияи миллӣ оид ба назорати маводи нашъаовар дар Ҷумҳурии Тоҷикистон барои солҳои 2021–2030» ва бахшида ба Рӯзи байналмилалии мубориза бар зидди нашъамандӣ ва гардиши ғайриқонунии маводи мухаддир, ҳамасола  26 – уми июн гузаронида мешавад, дар ҳамбастагӣ бо Мақомоти иҷроияи ҳокимияти давлатии ноҳияи Бобоҷон Ғафуров аз ҷониби масъулини бахши кор бо ҷавонон ва варзиши ноҳияи Бобоҷон Ғафуров аксияи умумиҷумҳуриявӣ таҳти унвони «Мо – ҷавонон бар зидди нашъамандӣ мубориза мебарем!» баргузор карда шуд.

Чорабинии мазкур бо мақсади пешгирии паҳншавии нашъамандӣ дар байни наврасону ҷавонон, тарғибу ташвиқи тарзи ҳаёти солим, ҷалби ҷавонон ба варзиш ва илмомӯзӣ, инчунин баланд бардоштани ҳисси масъулияти шаҳрвандии онҳо роҳандозӣ гардида, дар он волонтёрони бахш, варзишгарон, ҷавонони фаъол, ташаббускорон ва намояндагони соҳаҳои гуногуни ноҳияи Бобоҷон Ғафуров муттаҳид шуданд. Чорабинии мазкур дар кӯчаву хиёбонҳои марказӣ, бозорҳо, марказҳои хизматрасонӣ ва маҳаллаҳои аҳолинишини ноҳия ба таври васеъ фаро гирифт.

Дар натиҷа зиёда аз 600 варақаҳои таблиғотӣ дастраси сокинон гардонида шуд.